محمد الصاوي يكشف حقيقة خلافه مع عادل إمام بسبب «اللعب مع الكبار»

تحدث الفنان القدير محمد الصاوي عن كواليس عمله مع الزعيم عادل إمام، كاشفًا العديد من الأسرار والمواقف الإنسانية التي جمعته بالزعيم على مدار سنوات طويلة.

وأوضح محمد الصاوي، في لقاء خاص مع الإعلامية نهال طايل ببرنامج تفاصيل، المذاع على قناة صدى البد 2، قائلاً: "عادل إمام من الشخصيات الجميلة جدًا، لما تقرب منه تحس إنك تعرفه من سنين، أول تعامل بينا كان في فيلم (اللعب مع الكبار) مع المخرج شريف عرفة، كنت قلقان وخايف جدًا، لكن شريف عرفة طمني وقال لي: هتشوف اللي هيحصل، ادخل العب واستمتع".

وتابع محمد الصاوي، حديثه قائلاً: "بمجرد ما دخلت اللوكيشن، لقيت الأستاذ عادل بيناديني: صاوي تعالى تعرف تلعب طاولة؟! لعبنا وضحكنا قبل تصوير المشهد، حسّيت كأننا اشتغلنا مع بعض قبل كده. لما سألته ليه عمل معايا كده، قال لي بمنتهى البساطة: (بص يا صاوي، أنت وحش أبقى أنا وحش، أنت حلو أبقى أنا حلو). حوار إنساني بحت، فيه صدق غير عادي".

ونفى محمد الصاوي الشائعات التي تداولت عن وجود خلافات بينه وبين الزعيم، قائلًا: "مستحيل يكون في بيني وبينه خلاف، علاقتي بيه قديمة جدًا، من أيام ما كنت أدرس مع أخوه عصام إمام في مدرسة السعدية. كنا بنروح نذاكر في بيتهم. لدرجة إن الزعيم مرة دخل علينا وإحنا بندخن سجاير وقال لي: (أنت اللي معلم أخويا التدخين؟) ثم ضحك وأعطانا آخر علبة وقال مفيش تدخين بعد كده كان دايمًا بيضحك معانا وبيهزر".

وعن طابع الزعيم عادل إمام، في أماكن التصوير، أوضح الصاوي أن ما يتردد عن عصبية عادل إمام غير صحيح، مؤكدًا أن الزعيم حريص على جودة العمل فقط، مضيفًا: “هو مش عصبي مع الناس، لكن عايز الشغل يتعمل بأعلى مستوى، لو حس إن حد مش مظبوط، بيشد شوية علشان نطلع أفضل ما عندنا، إنما عمره ما اتعصب بشكل شخصي على حد".

كما تطرق محمد الصاوي للحديث عن قيم الفن والعمل بين الفنانين قائلاً: “أقرب طريق لقلوب الناس هو التواضع. أنا بطبعي بحب الناس ومبعرفش أزعل حد ولا أختلف مع حد، حتى لو حد عمل حاجة تزعجني، بنساها ومابتقفش معايا، بحب أتعامل مع الكل بحسن نية وبساطة.”

وفي ختام حديثه، أشار الفنان محمد الصاوي إلى أنه تخرّج من كلية التجارة ثم إلتحق بمعهد الفنون المسرحية بسبب عشقه الكبير للتمثيل.

https://youtu.be/wQUV7DpVo6E?si=Z2AK6Nyg3y-f7L_n