موجات حر استثنائية.. الأرصاد تحذر من طقس الأيام المقبلة وتوجه نصائح مهمة

كشفت الدكتورة منار غانم عضو المركز الإعلامي بالهيئة العامة للأرصاد الجوية تفاصيل حالة الطقس وسبب ارتفاع درجات الحرارة.

وقالت خلال تصريحات هاتفية مع أحمد دياب وسارة مجدي ببرنامج صباح البلد على قناة صدى البلد: ارتفاعات طفيفة جداً في قيم درجات الحرارة، مش ارتفاعات ملحوظة، يعني هنكون أعلى من الأيام اللي فاتت بحوالي من درجة لدرجتين، وده يعتبر حول إلى أعلى من المعدل الطبيعي للفترة دي من السنة بحوالي درجة لدرجتين. يعني متوسط قيم درجات الحرارة من النهاردة لحد نهاية الشهر أو منتصف الأسبوع اللي جاي على الأقل ما بين 35 و 36 درجة مئوية، فده ارتفاع طفيف عن الأيام الماضية.

وتابعت منار غانم: هناك زيادة في نسب الرطوبة، لأن معظم الهوا اللي بيأثر علينا أو الكتل الهوائية اللي بتأثر علينا جاية من على البحر المتوسط. فزيادة نسب الرطوبة بتخلي إحساسنا بقيم درجات الحرارة أعلى، الـ 35 والـ 36 دي في الظل في مكان جيد التهوية، لكن مع زيادة نسب الرطوبة أيضاً في الظل، إحساسي بقيم درجات الحرارة أعلى بمعدل درجتين، يعني محسوسة في القاهرة الكبرى 37 و 38 درجة مئوية بسبب بس نسب الرطوبة اللي موجودة في الجو. 

وصرحت منار غانم على مدار أسبوع أو حتى كمان حوالي 10 أيام، قيم درجات الحرارة في أغلبها 35 لـ 36، وكمان لما الفترة بتطول في ارتفاع الحرارة، ده بيخليني أحس بقيم درجات حرارة كمان مرتفعة، فالطقس ما بين الحار الرطب فترة النهار إلى شديد الحرارة الرطب فترة النهار على مدار أسبوع إن شاء الله في أغلب محافظات الجمهورية. الأماكن الساحلية هي الأعلى في نسب الرطوبة والأقل في قيم درجات الحرارة، ومحافظات الصعيد، كل ما بتجه للداخل نسب الرطوبة بتقل وقيم درجات الحرارة بتزيد، الأقصر وأسوان بالفعل 40 و 41 درجة مئوية."

وواصلت منار غانم: "لكن لازم ناخد احتياطاتنا مش على مدار الأسبوع ده أو الأسبوع اللي جاي، على مدار الـ 3 شهور بتوع فصل الصيف، إن إحنا نتجنب التعرض المباشر لأشعة الشمس، لو أنا هخرج فترة الظهيرة يكون معانا حاجة تحمينا من أشعة الشمس زي شمسية أو كاب، أحتمي بأماكن ظل. مهم كمان مأقفش فترة طويلة تحت أشعة الشمس وأغير درجة حرارة جسمي باستمرار كل ربع ساعة أو نص ساعة. مهم كمان أتواجد في أماكن جيدة التهوية.

واختتمت تصريحاتها قائلة: بالفعل عندنا بعض البلدان في غرب أوروبا بتشهد موجة استثنائية من موجات ارتفاع قيم درجات الحرارة، وقيم درجات الحرارة هي أعلى من مصر ، يعني إحنا لما بنسجل قيم درجات حرارة 34 و 35 بعض المدن في فرنسا بتسجل 42 ووصلت لـ 44 درجة مئوية.