الفنان مصطفى شوقي يكشف أعماله الجديدة وأسرار طفولته وطقوسه في رمضان

كشف الفنان مصطفى شوقي تفاصيل أعماله الجديدة وخوضه تجربة التأليف، بالإضافة إلى أسرار لأول مرة عن طفولته وأشهر أغانيه «يا ملطشة القلوب».

وقال مصطفى شوقي في تصريحات تلفزيونية، إنه سيطرح أغنية أهلاً نورت البيت لشهر رمضان 2026 كلماته وألحانه وتوزيع مايكل جمال، وإنتاج ريتشارد الحاج.

واستكمل حديثه عن أعماله الجديدة، قائلًا: «وشغالين في أغنية اسمها (عجيبة الدنيا دي) مع مايكل جمال، كلماتي وألحاني، وأفاضل بين حوالي 3 أغاني ولم استقر إن كنت سأتعاون مع صناعهم».

وعن طقوسه في رمضان، قال مصطفى شوقي: «أنا في رمضان أحب أقعد في البيت بس أحيانًا بيبقى فيه شغل لكن معظم الوقت قاعد في البيت وبحب أقرأ جدًا في رمضان وأختم القرآن.. القراءة مهمة جدًا وقت الصبح وشغلي لو موجود بيكون بالليل، يعني بعيش أجواء فيها قراءة كتير، سواء في الدين أو في مجالات أخرى، والقراءة ممتعة جدًا في رمضان، وكان فيه كتاب اسمه (حول العالم في 200 يوم) للأستاذ أنيس منصور قعدت 10 سنين أحاول أقرأه، كل ما أقرأ كام رحلة أسيبه وأنساه وأرجع أقرأ تاني أكون نسيت الرحلات دي فأرجع أقرأها تاني، من كتر ما هو ممتع».

وأضاف: «مبحبش الروايات مابقرأش روايات، أنا بحب أقرأ في التاريخ، في الجغرافيا، في الدين، ميال إني آخد معلومات.. مش ميال إني أعيش في خيال كاتبه حد، عشان كدة مستغرب أنا كتبت المسلسل إزاي أصلاً مع إني مش ميال أصلاً للكتابة دي».

كما كشف تفاصيل خوضه تجربة التأليف، قائلًا: «فيه صحبة ليكي أو شراكة ممكن تفجر عندك طاقات إنتي مش واخدة بالك منها، فأنا مع ريتشارد الحاج تحديدًا في الأغاني اللي بعملها ثقته في شغلي وفي اقتناعه بيا كملحن فجرت عندي كمان طاقة التأليف، يعني أما عملت تجربة التأليف في (زي الدهب، وبؤبؤ) كانت عاجباه جدًا».

وأضاف: «مع مصطفى شوقي اسم أغنية بؤبؤ مش هتبقى غريبة، واللي ما يتسموا الجملة دي تحديدًا جت بعد ما الأغنية خلصت، وكان عندي فكرة كنت عايز في نص الأغنية أعمل ميكس ما بينها وما بين "يا ليل يا باشا يا ليل"، كنت عايز أدخل جزء من أستاذ أحمد عدوية فيها، وكلمت بالفعل الجمعية عشان ناخد تصريح منهم، بس قبل ما أعمل كدة قولت لريتشارد فاتشجع أوي، فقولت أجرب في الاستوديو الأول، لقيت الدنيا مش حلوة مش راكبين على بعض زي ما أنا عايز والأغنية هتطول أوي مننا فلغيت الفكرة».

وتابع مصطفى شوقي: «فسألت نفسي طيب ليه ما أحطش بقا سنيو كمان يكون لطيف بشكل مختلف عن الجزء بتاع أستاذ أحمد عدوية اللي أنا عايز أدخله ده بس الأغنية تستحمل جزء تاني، وجالي الجزء ده وأنا في الاستوديو سمعته لمايكل ويلا بينا نسجل على طول».

وعن سر أسماء أغانيه المختلفة، علق قائلًا: «والله هو حظي.. الأغاني اللي بتجيلي ليها أسامي لطيفة، والتجربة خضتها لوحدي في التأليف في آخر 4 أغنيات اللي هي "زي الدهب، وبؤبؤ، ومجاريح، واللي ميتسموا"، دول الأربعة اللي هما كلماتي وألحاني، ودي تجربة جديدة بالنسبة لي جدًا إن أنا أكتب وأكتشف عندي مهارة في كتابة الأغاني، حتة في دماغي مكنتش أعرف إن هي موجودة بعيدًا عن تأليف المسلسل، والحمدلله الأغاني عاملة شغل كويس، وبشكل عام في اختيار المواضيع مابحبش المواضيع التقليدية خالص، مابحبش الكلام المكرر، والفن فكرة، لما تبقى الفكرة مكررة وكل الناس بتقول نفس الفكرة دي حاجة أنا محبش أقف في الطابور ده، أحب أكون مختلف دايمًا».

وأضاف مصطفى شوقي: «بحب أعمل الحاجة اللي حاسسها، اللي شايف إن هي مختلفة، اللي شايف إن هي مميزة في لحن أو في كلمة أو في توزيع أو في التلاتة، لأن ده هيخليني أدي بصمة في الصوت كمان، من غير ذلك هبقى مطرب عادي جدًا، وأنا ماتعودتش أكون عادي أنا دايمًا أبص للاختلاف، لكن قصة الشعر والدقن أنا ده مش عامله لسبب، ده أنا من زمان، من وأنا صغير وأنا شعري عامل كدة».

وقال مصطفى شوقي عن طفولته: «معتقدش كنت طفل متعب وإلى حد ما كنت شاطر في المدرسة لأن أنا من بيت تربوي لأن الوالد والوالدة مدرسين فاللي مش بتستوعبه في المدرسة بتستوعبه غصب عنك في البيت، وفي البداية كانوا معترضين عن اتجاهي لمجال الفن والغناء وطلبوا حصولي على شهادة الكلية الأول وبعدها اتجه للطريق اللي أحبه».

واختتم: «ابتدى نشاطي في الفن من الكلية، كنت محدد اتجاهي في الفن من الكلية».